Түштүк Азия университетинин өкүлдөрү илимий-практикалык конференцияга катышты

2026-жылдын 16-октябры / Бишкек

2026-жылдын 16-октябрында Бишкек шаарында Кыргыз Республикасынын Президентине караштуу Улуттук илимдер академиясынын Тоо физиологиясы жана медицина институту уюштурган, профессор К.А. Собуровдун 75 жылдыгына арналган «Адамдын жана жаныбарлардын иммундук системасынын физиологиясы: фундаменталдык жана прикладдык аспектилер» аттуу илимий-практикалык конференция болуп өттү. Иш-чарага Түштүк Азия университетинин окутуучулары жана студенттери катышты.

Конференциянын программасында университеттин илимий иштер боюнча проректору, медицина илимдеринин кандидаты Айнура Сатаркулованын жана авторлошторунун «Өрт өчүрүүчү-куткаруучулардын адаптациясынын функционалдык стратегиялары» темасындагы баяндамасы сунушталды. Ошондой эле «Терапиялык стоматологияны окутууда симуляциялык технологияларды интеграциялоо: заманбап ыкмалар жана билим берүүдөгү натыйжалар» темасында университеттин өкүлдөрү катышкан авторлор жамаатынын баяндамасы программага киргизилди.

Ошол эле күнү «Кыргыз Республикасынын бийик тоолуу аймактарынын тургундарынын ден соолугунун абалы» аттуу тегерек столдо Айнура Сатаркулова «Кыргыз Республикасынын тоолуу аймактарынын тургундарындагы жүрөк ритминин вариабелдүүлүгү жана психофизиологиялык изилдөөлөрдүн абалы» темасында баяндама жасады. Анда лабораториянын изилдөөлөрүнүн жыйынтыктары жана 2040-жылга чейинки өнүгүү багыттары каралды.

Университеттин мындай илимий иш-чараларга катышуусу изилдөөчүлөрдүн жана студенттердин академиялык байланышын кеңейтүүгө, тажрыйба алмашууга жана илимий кызматташтыкты бекемдөөгө өбөлгө түзөт.